Случај

„Алфите“ претепале скопјанец пред очите на сопругата и двегодишниот син

Сопругата на Зоран Стојчевиќ тврди дека „алфите“ тепале без повод, а од МВР велат дека специјалците биле предизвикани

ГОРАН АДАМОВСКИ

Триесет и осумгодишен скопјанец бил брутално претепан од тројца припадници на полициските „алфи“ пред очите на сопругата и двегодишниот син. Зоран Стојчевиќ во бессознание најпрво бил пренесен во поликлиниката „Букурешт“, а потоа и на шиење на повредите на главата во Воената болница. Неговата сопруга тврди дека немало никаква причина за насилничкото однесување на „алфите“, но од МВР велат дека Стојчевиќ, кој бил под дејство на алкохол, а згора возел и нерегистриран автомобил, им се заканувал, а потоа и ги нападнал полицајците. Случајот, веројатно, ќе биде разрешен на суд, бидејќи и двете страни најавија кривични пријави.

Инцидентот се случил во неделата околу 21,30 часот кај Трговскиот центар во населбата Козле. Зоран Стојчевиќ со сопругата и двегодишното синче со возилото застанале на бензинска пумпа да наточат гориво.

„На семафорите пред трговскиот, автомобилот почна да ни шлајфува и не можевме да го придвижиме, по што темен ’фолксваген венто’ зад нас почна да ни свири. Мојот сопруг со рака им сигнализираше да не' одминат, но тие излегоа од возилото и тргнаа кон нас. Го извадија Зоран надвор и заканувајќи му се дека не знае со кого си има работа, му удрија неколку шлаканици“, потресено раскажува сопругата Благица. Тие подоцна се легитимирале дека се „алфи“ и му побарале документи за идентификација на Зоран, по што го одвлекле зад Трговскиот центар. Сопругата со синот тргнала по нив, прашувајќи зошто и' го тепаат сопругот, по што била грубо оттргната.

„Едниот од ’алфите’ извади пиштол и со кундакот го удри Зоран во главата, по што тој падна во несвест. Тогаш, тие почнаа да паничат дека направиле беља, го ставија Зоран во нивниот автомобил и го однеле пред поликлиниката ’Букурешт’, по што побегнале“, раскажува сопругата. Не знаејќи како го однеле нејзиниот сопруг, таа морала да се јавува во сите болници за да го пронајде. Медицинските сестри го освестиле Зоран и му ја исчистиле раната, а потоа го препратиле во Воената болница да му ги зашијат раните на главата. По два часа бил пуштен дома, но тогаш дошле униформирани полицајци, кои го однеле во станицата во Карпош.

„Го држеа петнаесет часа, по што еден од тепачите дојде со скината кошула, тврдејќи дека бил нападнат од Зоран, а тој е многу мирен човек, никогаш немал проблем со законот. Детето ни е вознемирено и постојано плаче. Нема да се смирам додека случајот не биде расчистен докрај“, револтирано вели сопругата.

Во МВР го потврдуваат инцидентот, но нивната приказна е поинаква од онаа на семејството Стојчевиќ. „’Алфите’ сакале да го легитимираат Стојчевиќ, затоа што сомнително се движел со возилото, но тој најпрво не сакал да сопре, а потоа почнал да ги омаловажува полицајците, при што удрил еден од нив. Му бил извршен алкотест, кој покажал процент на алкохол во крвта од 1.8 промили, а и ’голфот’ што го возел бил нерегистриран“, вели Иво Котевски, помошник-министер за информирање при МВР, дополнувајќи дека против Стојчевиќ се поднесени две кривични пријави.